A construción deste blog responde ás inquedanzas e á iniciativa dun grupo de nais e pais na defensa do ensino público e como medio de protesta ou mobilización fronte aos recortes da Administración e a continua desvalorización da educación pública de calidade en Galicia. Denunciamos as dificultades e os crecentes recortes e entendemos que este non é un problema exclusivo do profesorado, aínda que fose este colectivo o que iniciou as manifestacións ao respecto e a pesar de que tanto os medios coma o poder político pretendan facernos crer que isto é exclusivamente un conflito laboral do profesorado.
Os recortes, o desprestixio e as carencias aféctannos a todos e a todas, á calidade da educación dos nosos fillos e fillas, a toda a sociedade e pensamos que non podemos continuar impasibles, que temos o dereito e a obriga de protestar e denunciar publicamente esta situación, e que de non producirse unha auténtica mobilización social, polo menos que se escoite a nosa voz, a nosa disconformidade…
Este blog non ten ningún tipo de vinculación política nin sindical, e unicamente se crea como un espazo de información, comunicación e intercambio de opinións e experiencias cun obxectivo común, a defensa e a revalorización dunha educación pública de calidade.
Este movemento pretende facerse extensivo ás familias de todos os centros educativos do noso Concello, así como a todas aquelas persoas con sensibilidade e interese na reivindicación do dereito dos nosos fillos e fillas á calidade da súa educación nunha escola publica, de tod@s, para tod@s...

8 feb. 2012

A Xunta retrasa novamente a contratación do proxecto de obra do colexio de Nós

Oleiros, 8 de febreiro de 2012-. O Goberno autonómico retrasa novamente a contratación da redacción do proxecto de obra do futuro colexio de educación primaria que se situará en Nós. Así o sinalaron responsables da Consellería de Educación ao alcalde de Oleiros, Ángel García Seoane, nunha reunión mantida entre ambos organismos. Deste modo, o necesario equipamento docente acumula un retraso de máis de tres anos sen que de momento se definise o concretado nos prazos por parte da Administración galega.

A Consellería de Educación anunciara a contratación deste proxecto a través do DOG do pasado 22 de novembro. Neste anuncio marcábanse dous meses de prazo para a entrega á Consellería do documento de execución dos traballos. A pesar de que o pasado 19 de decembro procedeuse á apertura de sobres para a adxudicación deste, a día de hoxe continúa sen adxudicarse.

A redacción deste proxecto, que xa se incluía por parte da Xunta nos orzamentos xerais de 2010, e que se volveron a incluír nos de 2011, continúa sen realizarse a pesar de que o Concello realizara un forte investimento de 300.000 euros en adquirir e posteriormente ceder á Consellería os terreos para aloxar o centro.

García Seoane informará da situación aos colectivos sociais das parroquias de Nós e Iñás nos próximos días. Así mesmo, reunirase cos responsables dos centros educativos do municipio afectados por estes novos retrasos da Xunta.

http://www.oleiros.org

No hay comentarios:

Publicar un comentario