A construción deste blog responde ás inquedanzas e á iniciativa dun grupo de nais e pais na defensa do ensino público e como medio de protesta ou mobilización fronte aos recortes da Administración e a continua desvalorización da educación pública de calidade en Galicia. Denunciamos as dificultades e os crecentes recortes e entendemos que este non é un problema exclusivo do profesorado, aínda que fose este colectivo o que iniciou as manifestacións ao respecto e a pesar de que tanto os medios coma o poder político pretendan facernos crer que isto é exclusivamente un conflito laboral do profesorado.
Os recortes, o desprestixio e as carencias aféctannos a todos e a todas, á calidade da educación dos nosos fillos e fillas, a toda a sociedade e pensamos que non podemos continuar impasibles, que temos o dereito e a obriga de protestar e denunciar publicamente esta situación, e que de non producirse unha auténtica mobilización social, polo menos que se escoite a nosa voz, a nosa disconformidade…
Este blog non ten ningún tipo de vinculación política nin sindical, e unicamente se crea como un espazo de información, comunicación e intercambio de opinións e experiencias cun obxectivo común, a defensa e a revalorización dunha educación pública de calidade.
Este movemento pretende facerse extensivo ás familias de todos os centros educativos do noso Concello, así como a todas aquelas persoas con sensibilidade e interese na reivindicación do dereito dos nosos fillos e fillas á calidade da súa educación nunha escola publica, de tod@s, para tod@s...

21 may 2012


NOTA DE PRENSA
O colectivo “As Familias de Oleiros na defensa do ensino público”, fai chegar ao Conselleiro de Educación e Ordenación Universitaria, Jesús Vázquez, as máis de 700 sinaturas recollidas nos diferentes centros de ensino público do Concello de Oleiros, na provincia de A Coruña, demandando a esta Consellería que deteña a política de recortes e medidas que están a afectar negativamente á calidade do ensino público e manifestando o seu apoio á defensa da calidade da educación pública.

Este Colectivo, -que xurdiu dando resposta ás inquedanzas e á iniciativa dun grupo de nais e pais na defensa do ensino público e como medio de protesta ou mobilización fronte aos recortes da Administración e a continua desvalorización da educación pública de calidade en Galicia-, reclama asemade a converxencia e confluencia das distintas plataformas e iniciativas cidadáns en prol do ensino público nunha acción plural pero unitaria, que consiga concentrar o sentir xeralizado e a reivindicación común da defensa do ensino público nunha convocatoria común de manifestación ou mobilización social en defensa da calidade da educación na escola pública, a escola de tod@s e para tod@s.



Oleiros, Maio 2012.

No hay comentarios:

Publicar un comentario